L’assessor regionèl a la mendranzes linguistiches Bepe Detomas ge à arsegurà al Comun General de Fascia l finanziament de 1 milion e 800 mile euro da la Region per fèr fora la “Ciasa de la Moniarìa” a Sèn Jan

“Cognon vardèr de valorisèr al miec la potenzialitèdes e la ressorses al ben del teritorie fascian e de la cultura e identità ladina de noscia jent”. Chest l’empegn rebadì da l’Assessor regionèl Bepe Detomas en ocajion de la scontrèda tegnuda i dis passé te la senta de la Region con la neva procuradora del Comun General de Fascia Elena Testor, l’assistent Patrick Falser e l conseier de Procura Gianluigi De Sirena.

Endèna la scontrèda l'Assessor Detomas à sotrissà l'emportanza per Fascia de valorisèr al miec sia particolaritèdes e potenzialitèdes, e l’à confermà so empegn a meter a la leta del Comun General la soma de 1.800.000 euro, te trei egn, per la restruturazion del fabricat storich de la “Ciasa de la Moniaria” apede a la Pieif de Sèn Jan.

“L’é n resultat emportant, soraldut te chest moment de stentes economiches”, à recordà l’Assessor. Da chest an defat, de gra ence a la condivijion de la Jonta e di Presidenc Rossi e Kompatscher, l fondo di investimenc per la mendranzes linguistiches é stat endò metù a jir.

Te chest frabicat podessa troèr lèrga i ofizies di Servijes linguistiches del Comun General, la senta de l’Union di Ladins de Fascia, la redazion de Fascia de La Usc di Ladins e amò apede sales de registrazion per enjignèr programes ladins per radio televijions.

Jà da tropes egn encomai l fabricat de la Moniarìa partegn endò al Comun General, de grazia a l'enteressament de l'Union de Ladins de Fascia e de la aministrazions passèdes, ma ades l’é te na situazion de arbandon total.

L’é da sperèr donca che chest frabicat posse vegnir recuperà al più prest, ajache l fèsc pèrt del patrimonie storich de la comunanza de Fascia e l’à n gran valor artistich e culturèl, e ence ajache l’é logà apede a la Pieif, a l’Istitut Ladin, al Comun General, te n raion che te la storia l’é stat l zenter sozièl, culturèl e religious de la val. Con la restruturazion de la caserma Piave per i Servijes sozio-assistenzièi e etres intervenc coordené che era jà stac metui dant te de autra ocajions, Sèn Jan podessa donca troèr de nef sie luster e doventèr endò l cher sozièl e culturèl e de Fascia.