Di zboaunzbuantzekh rat soin khennt gètt auz viarhudart vert

Un anno di bike sharing sugli Altipiani Cimbri, ed è già tempo di bilancio: le ventidue biciclette elettriche nel corso del 2013 sono state noleggiate quasi quattrocento volte. La mountainbike a pedalata assistita è stato il modello più richiesto, mentre le citybike sono state le preferite dalle famiglie grazie alla possibilità di potervi applicare il seggiolino per i bambini.

Pinn lånngez un pinn tang bo da håm hèrta meararne urn liacht khinnta dar lust zo lega di nas auz vo dar tür, un zo stiana auzant z'arbata odar zo rasta odar zo macha sport.

A par ummaz hatt sa ågiheft zo triztla in in balt tragante da huam di earstn mörch bo da spitzan au tortimìtt 'z vrischez grass. Di meararstn anvetze sa håmen sa gisudlt hent un stiveln pittar earde von ekhar un soin sichar kartza müade zo pensàra zo macha no åndra fadìge.

Ma disa zait von djar iz ummana von pestn zo giana bidar ummar pa' begela un staigela, saiz zo vuaz odar pinn rat. Vor a djar, in dise tang defatti, dar Selbartgiredjart Toalkamou vodar Zimbar Hoachebene hatt offigitånt dar servitzio vo bike sharing gihoazt “E.Motion”, zoa zo magaze mövarn af di Hoachebene åna zo macha fadìge un åna zo macha schade dar natur.

Di drai statziongen bo da soin khennt augimacht atz Folgrait attavorå dar APT, atz Lavrou in gart von Toalkamouhaus un atz Lusérn in platz, gèm in laigom a rat pitt a motor bo da hèlft zo macha gian uminimm di pedél. Asó, sbitznante mindar, makma gian ummar pan schümmane pèrng von drai kamöundar.

In djar 2013 di rat soin gest zene atz Folgrait, achte azt Lavrou un viare atz Lusérn. Halbe vo dise soin gest mountainbike un halbe citybike. Ånka azta dar servitzio iz ågiheft laise vor ploaz problème bo da soin auzgispunk af di statziongen a bòtta ågiheft z'arbata, di rat soin khennt gètt in laigom 340 vert, 270 lai vor an halm tage, 70 vo morgas fin abas. In allz ditza möchtma ånka halt da kunt 40 noledje vo an ur, givorst von laüt zo vorstìana bia 'z iz pedalàrn pitt a rat pinn motor.

Di mountainbike soin gest di sèlnen mearar givorst. Un aft ditza iz gest destar vorstian umbromm: aft di hoachebene soinda mearar baz 400 kilometre baize begela pitt sånt un khnottn, dise rat gian bobrall. Di citybike anvetze soin khennt ginützt daz meararste von famildje umbromm hintar makmada åhengen a khlummaz karégle vor di khindar.

Vor haür dar servitzio bart sogetàrn zo giana vür hèrta gilaich: zo nemma a rat in laigom mochtma åvorsan in laüt bo da arbatn in di APT un trang di bitchi bodrumm vor 'z iz abas, asó bi 'z iz khennt vür in lest summar. Vo naügez bartnda khemmen offigtånt zboa naüng statziongen: ummana affon sea vo Lavrou un ummana a Karbonare bo ma bart mang lazzan di lern batterie un nemmen au di givazzatn.