'Z vich iz girift in di Vesandar, khennt her vo Slege

È passata una settimana da quando l'orso ha sferrato il suo ultimo attacco al bestiame sui pascoli di Passo Vezzena, ma il dibattito sulla presenza del plantigrado non sembra placarsi. La popolazione degli Altipiani Cimbri è divisa tra chi vede di buon occhio il ritorno nei boschi di questo grande predatore e chi invece sente minacciata la propria sicurezza di svolgere attività nel bosco.

'Z izta pasàrt a boch sidar in sèll 2 vo ludjo benn da di telekåmere von birthaus in Vesan håm abeginummp in per bo da tritzlt di vünve morgas ummar pa piazàl, un in dise tang hattma gihöart kontarn alla dar sort aft ditza vich.

Viln gloam ke di foto soin khennt gibèkslt pinn computer, un ke dar per bo da da iz drau iz ummandar abeginummp vo 'nar an imàgine von Kanada. Zo khödaz gåntz, in ummana von drai foto – az ma sauget girecht – sekma eppaz ummamum in tschàttn bo da nètt geat: a liacht bo da da nètt iz in anìaglan åndarn kantou vo dar fotografia.

Bar odar nètt, ånka azta dise foto soin khennt ummargilekh zoa zo macha reklåm, soinda hèrta di zbolf khüa gitöatet un givrezzt aft di pèrng vo Slege un von Vesandàr, bo da khön ke eppaz vo naügez izta aft dise Hoachebene. Ja, umbromm a groazez vich hatt gipokht un gitöatet in zboa bochan khüa un khelpla in di khesrarn bo da gian vo dar Marcesina fin in di Frattn.

Attavorå ditza di laüt toalnze au. 'Z izta ber da khütt ke ditza vich mochat nètt stian in ünsarne beldar umbromm 'z macht di vort. 'Z bart nimmear soin sichar gian na sbemm alumma, odar machan di staigela pinn khindar odar pinn hunt umbromm ma dar per magat gèm zuar. Un az bèrat nètt ginumma, di stadjong iz nå zo giana zuar in summar, benn ünsarne pèrng vüllnze pitt turistn. A söttaz sachan magat soin eppaz bo da vörtet di laüt, machanten zornir åndre lentar.

Di kontra, aft internet, izta ber da khütt ke dar per iz gest a vich bo da hatt gilebet vo hèrta in di beldar vo dar Hoachebene, un azzar khearat bidrumm berat a schümmaz sachan. Ånka azzar hatt gimacht schade in khüdjrarn iz nètt khött ke dar berat guat zo pòkha un zo paiza a mentch, umbromm von månnen vörtetarze.

Darnå daz sèll bo da iz khennt vür in di Vesandar di konsildjarn Passamani, Degodenz un Tonina von Upt håm ånka gitrakh vür an interogatziong in vorsitzar von Konsildjo vo dar Provintz vo Tria, Bruno Dorigatti. Ma böllat vorstìan baz da di Provintz bart tüan zoa azta dar per höart au zo macha schade in di khesrarn, un bia ma bart tüan zo sauga au azzar nètt pòkht månnen odar khindar.